Mar 11 | WEDTOPURA | STEP | Tauhi Jerusalem hi tutugheregherei, au Bethphage ma Bethany, Olives oyana au gheregherena ma ana tauvotaghotagho ruwagha i aiparitawanehi,

Mark 11

Yesu au Jerusalem i rui

(Mat 21:1-11; Luk 19:28-40; Jhn 12:12-19)

1 Tauhi Jerusalem hi tutugheregherei, au Bethphage ma Bethany, Olives oyana au gheregherena ma ana tauvotaghotagho ruwagha i aiparitawanehi,

2 Ma we nana'arena i riwehi, “Ona nae meyagaina au naota awarina ma marainana au meyagaina ona ruirui, apo donki ghaubona raghiraghitana ma egha aiya'i ita gerugeruiya ona inanai, ona kaiweni ma weka ona neiyai. 3 We kauwana ona ghohaghohai ma aiya'i ina rau-bayademi da aiwa'ai aubaina o ghohaghohai, yamna ona riwei, ‘Bada i ghoheghohei, mara tupona ava aubaina ma inapari tawanana meyeiyai.’”

4 Tauhi hi nae da donki raghiraghitana, metaeta au naona hi inanai ma hi kaiweni. 5 Taumahiri, hi inanahi ma hipa, “Aiwa'i aubaina donki na o kaikaiweni?”

6 Yesu ponana hi pari-verehi ma tauhi hivi aninehi. 7 Donki hi naiyei Yesu awarina ma gara au uputuwana hi hesi ma tauna i geru. ^{▼▼11:7See 2 Kings 9:12-13} 8 Rava maghamaghauhi gara au etanai hita uri ma ghehauhi ai ruguruguna hi yavahehi. 9 Ma rava ghehauhi etanai hi raveni ma ghehauhi hivi muri ma hi garagarara:

“ Hosanna, viahi'ahinana, aiyai tauna God wavanei, i ne'i, ^{▼▼11:9
,} ^{▼▼11:9au naona anona yamna, marina mavi yawahaniai ma muriyai hivi rai da rava hevovo hepahepai ma hevivi egwayauwei.}
10 Vi'ahi'ahinana, e nenei da inavi bada me amata David; Hosanna au aidamo.”

11 Yesu au Jerusalem i rui ma i ghae au temple, aiwa'i anatapuna i tuvirevirei ma madegha i kwahakwaha aubaina ana Aposel 12 maitehi hi nae au Bethany.

Yesu kaiyaha i kuvari

(Mat 21:18-19)

12 Mara tomgheha, tauhi au Bethany da hi ghaeghae au Jerusalem ma Yesu am i hiraghe. 13 Au uwama ma kaiyaha ana ruguruguna i inanai, i nae da ita inanai, ana'anona bo e'egha. Kaiyahana ruguruguna ava aubaina ai uwauwa egha ahi mara. 14 Ana tauvotaghotagho, hi rau-rautanighana ma kaiyahana i kuvari, “Egha meyanai aiya'i anom ina ammeyei!”

Yesu tauvi gimagimara ivi yaghaghana hopunehi

(Mat 21:12-17; Luk 19:45-48; Jhn 2:13-22)

15 Maranana au Jerusalem hi ghe'eta ma Yesu au temple i rui ma tauvi gimagimara ivi yaghaghana hopunehi. Mane tausenisihi ma kiu taugimarehi ahi teiboro ma ahi anitughura ivi touvirahi, ^{▼▼11:15Dobugheha manena hi senisenisi virai} 16 ma ivi gha'a da temple au orana egha aiya'i inavi gimagimara. 17 Viharaharamana ivi kareni ma i riwehi, “God riwana hi girumi da, a'u numa yamna pari numana aubaihi ^{▼▼11:17See Isa 56:7}

ma taumi o ghohai da me taudanedanene ahi gabu.” ^{▼▼11:17See Jer 7:11-15}
18 Pirisi ghaeghaehi ma raugagayo tauvi haraharamanahi hi nonori mavi hiraghenana ogatarana hivi kareni, anona tauhi hi rovowei aubaina patara ghaeghaenana ana viharaharamana hi bahebahei.

19 Aubigai, Yesu ana tauvotaghotagho maitehi Jerusalem hi netawanei.

Kaiyaha i po'i

(Mat 21:20-22)

20 Hubahubanai tauhi hi naenaeme ma kaiyahana hi inanai da i poi. 21 Peter Yesu ana dede i notai ma i riwei, “Ma inana! Kaiyahana u kuvakuvariya i hiraghe.”

22 Yesu i pari-beyehi, “God awarina onavi tumaghana. 23 A ririwana kauwemi, aiya'i da wei oyana ina riwei da inavo mahiri ma ina tawanana meyei au boga ma egha ina nuwahaburu ma aiwa'i i yatoyatoniya inavi tumaghanei apo i ririweiya ina tupuwa. 24 Wei yamna aubaina a riwemi, maranana o rau-raupari ma aiwai ovivi baghei ma ovi tumaghana da o vaini ma aiwai ovivi baghei God ina veremi. 25 Ma marainana o rau-raupari, maeturaturam ahi ghohaboa awarimi ona nota tawanei, yamnei amam au mara taumi ami ghohabo'a ina nota tawanei. Ma ina pa egha ona nota tawanei apo amami au mara egha ami ghohabo'a ina nota tawanei.”

Jew babadahi Yesu ana vibada hivi tarapiriyei

(Mat 21:23-27; Luk 20:1-8)

27 Tauhi hi nememei au Jerusalem ma Yesu temple au horana i rui, piripirisi ghaeghaehi, raugagayo tauvi haraharamanahi ma babada ghehauhi hi nei Yesu awarina, 28 ma hi rau-bayadei, “Aiwa'i riwapananei wei ghohahi e ghohaghohahi? Aiya'i riwapanana i verem?”

29 Yesu i pari-beyehi, “Ta'u raubayada tagogi ana raubayademi ma ina pa onapari beye'u, yamna ana riwemi da aiwa'i riwapananei we ghohahi a ghohaghohai. 30 Ona riwe'u, John mepa ana riwapana i vaini da i bababataito: yamna Godei bo ravei?”

31 Tauhi hivi tarapiri vivira, “Aiwa'i tana yatoni? Ina pa tana riwa da Godei; apo ina pa, aiwa'i aubaina da John egha otavi tumaghanei? 32 Ina pa tana riwa da ravei...” Tauhi rava hi rovowehi aubaina rava anataputapuhi hi ririwa da John anina peroveta. ^{▼▼11:32See Luk 20:6} 33 Yamna aubaina tauhi Yesu hi pari-beyei hipa, “Tauai egha ata haramanei.” Yesu tauhi i riwehi, “Yamna aubaina da ta'u egha ana riwemi, aiwa'i riwapananei we kauwahi a kaukauwehi.”